Աղստևը Իջևանի բնության հուշարձան կամ աղբավայր

Աղստևը Իջևանի բնության հուշարձան կամ աղբավայր

                 

22.07.2019

Աղստև գետը հոսում է Հայաստանում և Ադրբեջանում: Այն սկիզբ է առնում Փամբակի լեռներից: Սկզբում մի փոքրիկ առվակ է, սակայն Դիլիջանի մոտ հորդանալով դառնում է ջրառատ գետ:

Այն Հայաստանի ամենամեծ գետերից է և Իջևանի բնության հուշարձանն է, սակայն ծառայում է որպես աղբաման, որի մեջ են թափվում կենցաղային, շինարարական և այլ տիպի թափոններ:

Անցյալում գետը շրջապատված էր գեղեցիկ ուռենիներով, սակայն ներկայումս դրա փոխարեն գետի շրջակայքում կառուցված են շենքեր, խանութներ, սրճարաններ: Հարակից շենքերի բնակիչները, ինչպես նաև խանութների աշխատողները հենց պատուհաններից սննդի մնացորդները, աղբը լցնում են գետը կարծելով, որ  ինքն իրեն կմաքրվի:

Գետի աղտոտվածությունը մեծ վնաս է հասցնում գետի ձկնատեսակներին, ինչպես նաև գետի ջրերով ոռոգվող հողամասերին:

Մի անգամ քայլում էի կամրջով և նկատեցի, որ մի տղամարդ ծխախոտի տուփը նետեց գետը, սակայն այն չընկավ, այլ մնաց կամրջի ճաղավանդակների արանքում: Ես նայելով այդ տղամարդու աչքերի մեջ, վերցրի տուփը և նետեցի մոտակայքում գտնվող աղբամանը: Ինձ թվում է իմ այդ արարքը ազդեց այդ մարդուն: Սակայն կան մարդիկ, ովքեր չեն ընդունում իրենց սխալները: Օրինակ մի անգամ մի կին երկու տոպրակներ լցված ահռելի քանակությամբ աղբով՝ նետեց գետը: Ես մոտեցա նրան և խնդրեցի, որ մյուս անգամ չկրկնի նման սխալ, սակայն նա ինձ վիրավորեց և շարունակեց իր ճանապարհը:

Ինձ թվում է նման մարդկանց սաստելու միակ միջոցը տուգանքն է:

Իջևանի համայնքապետարանը նախկինում մի քանի անգամ իրականացնում է գետի մաքրման աշխատանքներ՝ ինչպես մասնակի, այնպես էլ ամբողջական:

Սակայն ցավոք պետք է փաստենք, որ Աղստևը շարունակում է աղտոտվել, թե՛ քաղաքացիների կողմից, թե՛ առանց խոչընդոտ գետը լցվող կոյուղաջրերով: Այն մարդիկ ովքեր շարունակում են աղտոտել գետը իրենց սխալ պահվածքը փորձում են արդարացնել, որ իբր թե գետը վարարելով ինքնամաքրվում է: Մինչդեռ այդ հարցը մի շարք ատյաններում բազմաթիվ անգամներ շահարկումների առիթ է դարձել և ադրբեջանցիները հարմար առիթը բաց չեն թողնում ու Հայաստանին մեղադրում են գետն աղտոտելու մեջ:

Սուսաննա Սառիկյան
Իջևան Ինֆոտուն