Մի քիչ էլ Իջևանի մասին

Մի քիչ էլ Իջևանի մասին

Նկարը վերցված է instagram-ից ijevanthebestcity էջի

Իջևանը տարիներ առաջ փոքրիկ գյուղ էր, որի բնակիչների մեծ մասը եկել էին տարբեր վայրերից, զբաղվում էին հողագործությամբ և այգիների մշակությամբ: Ոմանք զբաղվում էին նաև շերամապահությամբ: Ստացվող հումքն ուղարկում էին տարբեր գործարանների: Բնակարանների մեծ մասը գետնափոր էին: Թեև անտառը մոտ էր, բայց մարդիկ քիչ էին օգտվում անտառից: Հետագայում այստեղ սկսում են կառուցել շենքեր, գործարաններ: Առաջինը հիմնադրվում է փայտամշակման գործարանը:

  Հետաքրքիր էին նաև  ավանդույթները, սովորություներն ու խաղերը: Հիշում եմ՝ բաժանվում էինք թիմերի: Թիմերն իրարից կանգնում էին որոշակի հեռավորության վրա: Վերցնում էինք մեկ հատ մեկ ու կես մետր երկարությամբ փայտ, և մեկ հատ կես մետրանոց փայտ:
Կանոնները հետևյալն էին, երկար փայտով հարվածում էինք կարճ փայտին, պետք է փայտը հատեր հակառակորդի սահմանը, հակառակորդը պետք է հետ մղեր փայտը իր տարածությունից, եթե հետ էր մղում, ապա հաշիվը մեկով ավելանում էր օգուտ հակառակորդի, իսկ խաղը շարունակվում էր հակառակորդի տարածքից:                                
Կար նաև այսպիսի զվարճալի և գուցե նաև ցավոտ խաղ՝ ընտրում էինք մեկին (խաղացողներից մեկի ձեռքի մեջ որևէ իր էինք պահում սխալ գուշակողը լինում էր առաջին «զոհը») և բոլորը այդ անձին հարվածում էին գոտիներով, իսկ ում գոտին նա բռնեց այդ խաղացողը լինում էր հաջորդ «զոհը»:

                                                                                                                                                           

Նկարում ծաղկաբույծ Օնիկն է 

Իջևանում ապրում էին նաև հետաքրքիր մարդիկ: Նրանցից կհիշեմ ծաղկաբույծ Օնիկին: Նա 1946 թվականին հայրենադարձվել էր Ֆրանսիայից: Քաղաքում այստեղ-այնտեղ հողակտորներ էր վերցնում և ծաղիկներ մշակում, դրա համար էլ նրան անվանում էին ծաղկաբույծ Օնիկ: Այդ ծաղկանոցներից մեկը, որը թերևս ամենահայտնին էր,  գտնվում էր ներկայիս գինու գործարանի դիմային մասում:  Օնիկից հետո չվերամշակելով այգին հիմա կորցրել է իր տեսքը և կասեի նաև հետքը: Օնիկի ժամանակով քաղաքի այդ հատվածը դարձել էր քաղաք այցելող զբոսաշրջիկների ամենասիրված վայրերից մեկը: 

Լավ կլիներ, որ հիմա էլ քաղաքում նման հետաքրքիր ու գեղեցիկ այգիներ լինեն կամ գոնե եղածները վերականգնվեն:

Հիշեցնենք, որ Իջևան ԻնֆոՏունը  փնտրում  է հետաքրքիր պատմություններ Իջևանի և Իջևանում ապրած և ապրող մարդկանց մասին:

Մենք շարունակելու ենք  նմանատիպ հետաքրքիր պատմությունների բացահայտումն ու դրանք հասարակության սեփականությունը դարձնելու սկսած նախաձեռնությունը:

Պատմեց  Հայաստանի գրողների միության և Հայաստանի ժուռնալիստների միության անդամ, բանաստեղծ Թելման Մայիլյանը:    
Ամփոփեց Իջևան Ինֆոտան կամավոր Վահագն Մայիլյանը