«Կամավորության շնորհիվ ես շատ-շատ նոր բաներ եմ սովորել, որոնք չէի կարող սովորել դպրոցում կամ բուհում» Ա. Մինասյան

 Այսօր մենք զրուցում էինք Աննա Մինասյանի հետ, ով սովորում է  ԵՊՀ Ռոմանագերմանական բաժնի թարգմանչական գործ 1-ին կուրսում: Աննան  ֆլեքս ծրագրի շրջանավարտ է և Իջևան Ինֆոտան առաջին կամավորներից:

 - Աննա ինչպես գիտես ԻնֆոՏունը սկսել է  «Մի կամավորի պատմություն» խորագրով հարցազրույցների շարք, որի նպատակն է բարձրացնել կամավորության դերը հասարակության մեջ, և դու որպես մեր հաջողված կամավոր ընդգրկվել ես այդ ցուցակում:

 - Ինչպե՞ս իմացար Ինֆոտան մասին:

 - ԻնֆոՏան մասին շատ պատահական եմ իմացել: Երևի 4 տարի առաջ էր, մասնակցում էի «Ուսանող դեսպան» ծրագրին, որի դասերն անց էին կացվում համալսարանում: Եկավ ժամանակ, որ մենք տարածքի խնդիր ունեցանք և տարածքի բացակայության պատճառով Խաղաղության կորպուսի կամավորը մեզ բերեց Ինֆոտուն: ԻնֆոՏունը մեզ տարածք տրամադրեց և հյուրընկալեց իր հարկի տակ: Մենք շարունակեցինք մեր դասընթացներն այնտեղ: Առաջին անգամ այսպես եմ լսել:

Հետո սկսեցինք ամեն շաբաթ այցելել ԻնֆոՏուն: Վարսիկը մեզ ներկայացրեց իրենց ծրագրերը և  ԻնֆոՏունը դարձավ մեր երկրորդ տունը:

 - ԻնֆոՏան ծրագրերից ո՞ր մեկն ամենաշատը քեզ հետաքրքրեց և քեզ պահեց ԻնֆոՏանը:

  - Առաջին անգամ կամավորության ու ծրագրերի մասին ես լսել եմ հենց այստեղ: Հետաքրքիր էր քանի որ նոր մարդկանց հետ էինք ծանոթանում, դասընթացների էինք մասնակցում՝ նոր գիտելիքներ ու հմտություններ ձեռք բերում:

 - Ի՞նչ է կամավորությունը քեզ համար:

 - Կամավորությունն ինձ համար նոր բաներ  սովորելու, նոր ընկերներ ձեռք բերելու մեծ հնարավորություն է: Կամավորության շնորհիվ ես շատ-շատ նոր բաներ եմ սովորել, որոնք չէի կարող սովորել դպրոցում կամ բուհում:

Կամավորություն անելով դու քեզ բավարարված ես զգում, որ լավ բան ես անում հասարակության համար:

 - Ըստ քեզ քանի՞ տարեկանից պետք է ընդգրկվել կամավորական ծրագրերում:

 - Չեմ կարծում, որ կոնկրետ տարիք կա կամավորական ծրագրերում ընդգրկվելու:

Այն ժամանակից, երբ գիտակցում ես, որ կարող ես ինչ որ բան փոխել, սկսում ես փնտրել ինչ որ բաներ քո ապագա կարիերայի համար:

 - Ի՞նչ փոխեց Ինֆոտունը քո կյանքում, արդյո՞ք որևէ  դեր  կատարեց:

 - Ինչպես ասացի Ինֆոտանն եմ իմացել կամավորության մասին և Ինֆոտանն եմ դարձել կամավոր: Ինֆոտան կազմակերպած դասընթացներից մեկի ժամանակ ես լսեցի FLEX ծրագրի մասին և Ինֆոտան տված գիտելիքների ու փորձի շնորհիվ ես կարողացա դառնալ FLEX ծրագրի հաղթող, որն էլ ամբողջությամբ փոխեց իմ կյանքը:

 - Ի՞նչ խորհուրդ ունես քեզնից հետո եկող կամավորներին, այ մի բան, որ դու բաց ես թողել:

 - Խորհորդ կտամ լինել ավելի ակտիվ, փորձել մասնակցել հնարավորինս շատ ծրագրերի, չծուլանալ, չասել «հավես չկա», ճիշտ օգտագործելով իրենց ժամանակը: Այսպես դու ձեռք կբերես նոր ընկերներ և գիտելիքներ: Ուղղակի հորդորում եմ լինել ակտիվ և փորձել ինչ որ բան փոխել հասարակության և որ ամենակարևորն է քո մեջ ու քո կյանքում:

 - Մենք գիտենք, որ դու հիմա ուսանող ես, ինչպե՞ս ես համատեղում ուսումդ կամավորության հետ:

 - Սկզբնական շրջանում դժվար էր, սակայն ինչպես ասում են կարևորը ցանկությունն է: Ազատ ժամանակս մաքսիմալ եմ օգտագործում:

 - Մեկ նախադասությամբ ինչպե՞ս կնկարագրեիր Ինֆոտունը:
 - Ինֆոտունը  պոզիտիվ մարդկանցով լցված մի մեծ ընտանիք է, որոնցից շատ բան ենք սովորում: Այլ կերպ եթե ասեմ. կյանքը փոխող հետաքրքիր հարթակ:

 - Ի՞նչ կփոխեիր Ինֆոտանը, ի՞նչ խորհուրդ ունես:
 - Ոչինչ չէի փոխի Ինֆոտանը, ուղղակի կցանկանայի ավելի շատ երիտասարդներ ներգրավվեին Ինֆոտան նախաձեռնություններում:

 - Շնորհակալություն,  հետաքրքիր հարցազրույցի համար:

Զրույցը վարեց՝ Էմիլյա Ոսկանյանը
Իջևան Ինֆոտուն