«Իջևան համայնքի խնդիրների լուծումները նախընտրական ծրագրերում. Քննարկում Իջևանի ավագանու թեկնածուների միջև»

«Իջևան համայնքի խնդիրների լուծումները նախընտրական ծրագրերում. Քննարկում Իջևանի ավագանու թեկնածուների միջև»

            2019թ.-ին փետրվարի 17-ին Իջևանում տեղի ունեցան ավագանու ընտրություններ: Այս առիթով Եվրասիա համագործակցություն հիմնադրամի հյուսիսային մասնաճյուղն ի դեմս Իջևանի ինֆոտան կազմակերպեց  նախընտրական բանավեճ:

            Բանավեճին հրավիրվել էին բոլոր առաջադրված թեկնածուները, բացառությամբ 1-ի, ում հետ կապ հաստատել չէր հաջողվել: Հրավիրված 32 ավագանու թեկնածուներից հանդիպմանն իրենց մասնակցությունը մինչ քննարկման նախորդ օրվա վերջ հաստատել էին 25 թեկնածու, սակայն  ներկայացան միայն 9-ը:  Հատկանշական էր, որ թեկնածուներից 10-ը, ովքեր  նախկին ավագանու անդամներ էին, ոչ ոք չմասնակցեց քննարկմանը:

           

Միջոցառման նպատակն էր դեբատի ֆորմատով բարձրացնել համայնքի բնակիչներին հուզող հարցերը և լսել դրանց լուծմանն ուղղված թեկնածուների տեսլականները։ Բնակիչների կողմից հարցերի հավաքագրման համար օգտագործվեց նաև օնլայն հարթակը․ Ինֆոտան ֆեյսբուքյան ուղիղ հեռարձակման ընթացքում բնակիչներն հնարավորություն ունեին իրենց հարցերն ուղղել հենց մեկնաբանություններում:

Քննարկվող հիմնական թեմատիկ ուղղություններն էին՝

• Աղստևի աղտոտումը և աղբահանության խնդիրներն Իջևանում
• Տուրիզմի զարգացման հեռանկարներն Իջևանում
• Հանրային տարածքների վերաիմաստավորման հնարավորություններն Իջևանում
• Համայնքի կառավարման հաշվետվողականության բարձրացում
• Ավագանու դերի և ավագանու ինսիտուտի նկատմամբ վստահության  բարձրացում
• Համայնքային ենթակայության հիմնարկներ և դրանց գործունեությունը
• Համայնքում մշակութային և սպորտային կյանքի զարգացում
• Նոր ներդրողների ներգրավում
• Երիտասարդների մասնակցությունը համայնքի կառավարմանը
• Համագործակցություն համայնքում ակտիվ գործունեություն իրականացնող  կառույցների ու անհատների հետ:

       Յուրաքանչյուր թեկնածուին տրվեց ժամանակ ներկայացնելու իր ծրագիրը: Այնուհետ վերոնշյալ թեմատիկ ուղղություններով յուրաքանչյուր թեկնածուին տրվեցին 3-ական հարցեր՝ հաշվի առնելով նրանց ներկայացրած նախընտրական ծրագրերը, մասնագիտացումը և մինչ այս ծավալած գործունությունները:

Մասնակից բոլոր թեկնածուներն իրենց խոսքում ողջունեցին քննարկումը, ընդգծելով, որ սա նպաստում է ավագանու անդամների նկատմամբ բնակչության վերբերմունքի լավացմանը: 

           Հանդիպմանը մասնակցած 9 թեկնածուներից ընտրվել են 3-ը՝ Արման Մատինյան, Թաթուլ Աթաբեկյան և Խաչատուր Համզյան:

            Ընտրված թեկնածուներից Արման Մատինյանը խոստանում է ավագանի դառնալու դեպքում համայնքի կառավարումը դարձնել ավելի հաշվետվողական և թափանցիկ: Ինչպես նաև պլանավորում է իրականացնել բյուջեի առավել նպատակային բաշխում:  Նա նաև խոսեց համայնքային ենթակայության հիմնարկներում առկա խնդիրների մասին և նշեց, որ հետևողական է լինելու այդ կառույցների աշխատանքների լավացմանն ու բնակչության համար դրանց առավել գրավիչ դարձնելուն:  Այն հարցին թե ինչպե՞ս է գնահատում ՏԻՄ աշխատանքը հաշվետվողականության տեսնկյունից և որքան հաշվետվողական է այսօր ՏԻՄ-ը Արման Մատինյանը պատասխանեց, որ գործող ավագանու հաշվետվողականությունը գնահատում է զրո և ինքը ընտրվելու դեպքում քայլեր  է ձեռնարկելու հաշվետվողականությունն ապահովելու համար: 

Նա առաջարկում է օնլայն հեռարձակել բացառապես բոլոր նիստերը ինչպես նաև ավելացնում, որ ստեղծված իրավիճակը միայն ավագանու անդամների խնդիրը չէ, դա նաև մեր բնակիչներիս խնդիրն է, եթե բնակիչները լինեն պահանջատեր ավագանու անդամները կաշխատեն հաշվետվողական:

Համայնքի բյուջեի բաշխումը վերջին տարիներին Արման Մատինյանը չի գնահատում թափանցիկ և նշում է, որ պետք է տեսանելի դարձնել թե ի՞նչ է արվում: «Հարցը միայն թիվը պակասեցնելը կամ ավելացնելը չէ, այլ կոնկրետ նպատակային օպտիմալացումը: Բյուջեից սնվող բոլոր 30-40.000 աշխատավարձ ստացող կառույցների գործունեությունից համայնքը գրեթե օգուտ չի ստանում: Այստեղ նույնպես բացակայում է հաշվետվողականությունը»-ասում է նա: 

           

Մյուս ընտրված թեկնածուներից Թաթուլ Աթաբեկյանի հիմնական նպատակը ՏԻՄ ինստիտուտի լիարժեք կայացմանը նպաստելն է: Իսկ Աղստև գետի աղտոտվածության խնդրի մասին հարցին, Թաթուլ Աթաբեկյանը պատասխանեց, որ համայնքապետը, ավագանին, համայնքապետարանի աշխատակիցները պետք է օրինակ ծառայեն համայնքի բնակիչներին։ «Ես վերջին օրերին ականատես եմ եղել, թե ինչպես է կոմունալ ծառայության աշխատակիցը կամրջի վրայից աղբ թափում գետը և բնակիչը դա տեսնելով ինքը նույն կերպ կվարվի: Մենք պետք է օրինակ դառնանք բնակիչների համար»-ասում է Աթաբեկյանը: Ինչպե՞ս են աշխատում համայնքային ենթակայության տակ գտնվող հիմնարկները հարցին Թաթուլ Աթաբեկյանը ասաց, որ համայնքային ենթակայության հիմնարկեները հիմնականում լավ չեն գործում, աշխատողների քանակը ուռճացված է և հիմնված է խնամի-ծանոթ-բարեկամ սկզբունքի վրա: Նա նկատում է, որ համայնքային ենթակայության հիմնարկներն ունեն 50-ից 60 աշխատող, ովքեր գործով չեն զբաղվում  այլ ուղղակի գնում ու 9-ից 1-ը նստում սուրճ են խմում: «Հիմնարկներից կարող եմ նշել մշակույթի տան չաշխատողունակության փաստը, որտեղ տարվա կտրվածքով ընդամենը մի քանի միջոցառում է տեղի ունենում, դրսից գալիս ներկայացումներ են բեմադրում ու գնում»։

            Տուրիզմի զարգացման տեսանկյունից նշեց, որ քաղաքի գեղատեսիլ տեսքը կարելի է միանշանակ օգտագործել տուրիզմի զարգացման համար: Եվ նշեց, որ Իջևանի բոլոր կանաչ տարածքների վրա փակցված է «Վաճառվում է» ցուցանակ, իսկ մյուս մասը վաճառվել, օտարվել և մասնավորացվել է որոշ անձանց կողմից։

             Քննարկմանը մասնակցած թեկանածուներից Խաչատուր Համզյանը, ով նույնպես ընտրվել է նշում է, որ տեղյակ է բնակիչների մի շարք խնդիրներից, առաջադրման պատճառներից մեկն էլ հենց այդ  խնդիրներին լուծումն է: Մյուս հարցին թե տուրիզմի զարգացման ի՞նչ խոչընդոտներ ունի Իջևանը և ի՞նչ ռեսուրսներ են առկա, Խաչատուր Համզյանը, որպես խոչընդոտ նշեց ինֆորմացիոն կենտրոնի, վահանակների և wifi ծածկույթի բացակայությունը:

Իսկ ավագանու դերի և վստահության բարձրացման տեսանկյունից նշեց, որ միայն օնլայն հեռարձակումները բավարար չեն թափանցիկության ապահովման համար: Անհրաժեշտ է կազմակերպել հանրային քննարկումներ, որտեղ կլինեն բնակիչներ և ավագանու անդամներ:

            Նշենք, որ բանավեճի ուղիղ հեռարձակում-ն ապահովվել է Ինֆոտան Էջով և այն հասանալի է այնտեղ: Իսկ քննարկմանը ներկա էին նաև քաղ. հասարակության ներկայացուցիչներ, ովքեր ըստ օրակարգի վերջում հնարավորություն ունեցան նաև իրենց հարցերն ուղղել թեկնածուներին:

            Իջևան ինֆոտունը շնորհակալություն է հայտնում քննարկմանը մասնակցած բոլոր թեկնածուներին և շնորհավորում բոլոր նրանց ովքեր ընտրվեցին՝ հույս հայտնելով, որ ավագանու յուրաքանչյուր անդամ հետամուտ է լինելու իր նախընտրական ծրագրերում բարձրացրած խնդիրների լուծմանը: