Friday, May 18, 2018


2018թ.-ի երիտասարդական մայրաքաղաքում ի՞նչ հարթություն կտեղափոխվի երիտասարդների և տեղական ինքնակառավարման մարմինների միջև համագործակցությունը

2013 թվականից ՀՀ սպորտի և երիտասարդության հարցերի նախարարության կողմից իրականացվում է «Հայաստանի Հանրապետության տարվա երիտասարդական մայրաքաղաք» ծրագիրը: 2018թ.-ին այդ կոչման արժանացել է Իջևանը: Շատերը գիտեն այս մասին, սակայն գուցե ոչ բոլորն են լիարժեք տիրապետում ինֆորմացիային: Ենթադրվում է նաև, որ պետք է նոր հարթություն տեղափոխվի երիտասարդների մասնակցությունը համայնքի կառավարմանն ու  համայնքի հետ կապված որոշումների կայացմանը:  Այս ամենի մասին մենք այսօր զրուցում ենք Իջևանի փոխքաղաքապետ  պարոն Արթուր Ճաղարյանի հետ:
- Պարոն Ճաղարյան ինչո՞ւ հենց Իջևանը: Որո՞նք էին Իջևանի առավելությունները առաջադրված մյուս քաղաքների նկատմամբ:
- Հաղթող համայնքն ընտրվել է մրցույթի փորձագետների գնահատման, գաղտնի քվեարկության և sms հաղորդագրությունների արդյունքների հիման վրա: Մրցույթի փորձագետներն այցելել են Իջևանի տարբեր հասարակական կազմակերպություններ`Իջևան ԻնֆոՏուն, Հույսի կամուրջ, SOS մանկական գյուղ, Տավուշի երիտասարդական կենտրոն, ԵՊՀ Իջևանի մասնաճյուղ և տարբեր հյուրանոցներ: Իհարկե մեծ դեր են ունեցել այս կազամակերպություններն ու դրանցում  երիտասարդների ակտիվությունն ու գործունեությունը: 2017 թվականի սեպտեմբերի 4-ին մեզ  փոխանցել են երիտասարդական մայրաքաղաքի փոխանցիկ բանալին: Նախորդ տարիների հաղթող քաղաքներն են եղել  Սիսիանը, Ստեփանավանը, Գյումրին ու Չարենցավանը։



- Ի՞նչ կտա երիտասարդական մայրաքաղաք ճանաչվելը Իջևանին: Ի՞նչ նոր հնարավորություններ կբացվեն:
- Հիմնական առավելություններից մեկն այն է, որ մի շարք հանրապետական մասշտաբով սպորտային մրցույթներ, մշակութային և երիտասարդական միջոցառումներ իրականացվելու են հենց Իջևանում, ինչն արդեն մեծ ձեռքբերում է մեր քաղաքի համար:
- Որտեղի՞ց հնարավոր կլինի նախապես տեղեկանալ այդ միջոցառումների մասին:
- Բոլոր միջոցառումների ու կայանալիք իրադարձությունների մասին նախօրոք կգրվեն համայնքապետարանի կայքում (ijevancity.am):
- Ձեր կարծիով ի՞նչ խնդիրներ ունի այսօր Իջևանում ապրող երիտասարդը:
- Իմ կարծիքով զբաղվածության տեղերի բացակայությունն ամենաարդիական խնդիրներից մեկն է:
- Որքանո՞վ են այսօր իջևանցի երիտասարդները ընդգրկված համայնքի կառավարմանը: 

- Համայնքի երիտասարդների հետ համագործակցություններ շատ են լինում: Նրանք մեզ են ներկայացնում իրենց ծրագրերը, մենք տալիս ենք մեր թույլտվությունն ու հովանավորում: 
Այս առումով բավականին մեծ է կամավորական աշխատանքների դերը: Շատրվանների տարածքում ուսանողները նստարաններ, ծաղկամաններ, դեկորատիվ իրեր են տեղադրել, ներկել նստարանները:

Իջևանի համար պարտավորեցնող է ստանալ նման կոչում և հուսով ենք, որ մենք կկարողանանք պատվով պահել այն:
Երիտասարդական մայրաքաղաքի բնակիչ լինելով` մենք պետք է ցուցաբերենք մեծ ակտիվություն, մաքուր պահենք մեր քաղաքը և անենք ամեն ինչ, որ արդարեցնենք ստացած կոչումը:

Լիդա Ասիլյան,

Իջևան Ինֆոտուն


No comments:

Post a Comment